КНІГІ З КРАІНЫ ДЗЯЦІНСТВА

Баравікова, Р. А. Казкі астранаўта : касмічныя падарожжы беларусаў / Раіса Баравікова. - Мінск : Лiтаратура i Мастацтва, 2011. - 173, [2] с. 

Прыгодніцкія казкі Раісы Баравіковай – вядомай беларускай пісьменніцы, лаўрэата Дзяржаўнай прэміі Рэспублікі Беларусь – даўно палюбіліся юным чытачам. І вось – чарговая кніга казак, напісаных ад імя астранаўта-беларуса. Дзівосны, заманлівы і таемны свет далёкіх планет адкрыецца чытачу і, безумоўна, захопіць не толькі неверагоднымі прыгодамі герояў кнігі, але і цікавымі звесткамі пра асобныя зоркі і нават цэлыя сузор’і. Пісьменніца ўдала спалучае поўны нечаканасцей свет чужых планет з блізкім і родным светам нашай планеты, дзе, зразумела, самыя прыгожыя і добрыя пачуцці звернуты да Беларусі.



Ігнаценка, Рыгор Канстанцінавіч. Зацугляны шчупак : апавяданні: для сярэд. шк. узр. / Рыгор Iгнаценка. - Мінск: Лiтаратура i Мастацтва, 2009.- 143с.

Не знойдзецца, бадай, на Беларусі такой ракі, рачулкі або значнага ручая, у якім водзіцца рыба, каб там не сустрэў рыбака з вудаю. Гэтай цікавай справай з задавальненнем займаюцца як дарослыя, так і дзеці. Яшчэ больш захапляльным з’яўляецца паляванне. У кніжцы расказваецца аб абодвух відах гэтага рамантычнага спорту, аб удачах і няўдачах на паляванні і рыбалцы, смешных і кур’ёзных выпадках, цікавых назіраннях. А яшчэ гэта аповед аб здаровым ладзе жыцця і яго радасцях.


Рублеўская, Людміла Іванаўна. Прыгоды мышкі Пік-Пік : казкi: для мал. шк. узр. / Людмiла Рублеўская. - Мінск: Мастацкая лiтаратура, 2011.- 167с.

У звычайнай гарадской кватэры, у пакоі, які належыць маленькім Веранічцы і Максімку, жыве пад шафай тоўсценькая лянівая мышка. Гаспадары гэтай кватэры, Мама і Тата Веранічкі і Максімкі,— паэты. Мусіць, таму і мышка Пік-Пік не зусім звычайная мышка, гэтак жа, як і яе сяброўка, котка Пепіта. Казкі пра прыгоды мышкі Пік-Пік — удалая спроба прыўнесці казачны свет у звычайнае гарадское жыццё, даць сучасным дзецям зразумелага і блізкага ім героя. Мышка Пік-Пік, як і многія юныя чытачы, не любіць прыбіраць у сваёй норцы і вельмі любіць салодкае, марыць выйграць у конкурсе прыгажосці, заняцца бізнесам, праславіцца на тэатральнай сцэне… Усе яе прыгоды расказваюцца дасціпна, з гумарам, цікавыя і для самых маленькіх чытачоў, і для дарослых.

Мазго, Уладзімір Мінавіч. Прыгоды марахода : казкi, вершы, загадкi, песнi, скорагаворкi, пацешкi: для мал. шк. узр. / Уладзiмiр Мазго. - Мінск: Юнацтва, 2002.- 126с.
Вы не ведаеце, чаму сарокі носяць навіны на хвасце?.. А чаму кошкі не любяць хітрых мышак?.. А навошта афрыканскі папугай заляцеў у беларускі гай?.. Вы не сустракалі ката марахода, не чулі пра яго дзівосныя прыгоды?.. Ну тады гэтая кніга менавіта для вас. Юныя чытачы знойдуць тут прыгодніцкія казкі, вясёлыя вершы, дасціпныя загадкі, скорагаворкі, пацешкі. Кніга будзе вельмі карыснай вучням, бацькам і настаўнікам.







Бучынская, Н. С. Атракцыёны для вадзянікоў : былі і небыліцы пра жыццё надводнае і падводнае / Наталля Бучынская ; [ілюстрацыі А. Пазняка]. - Мінск : Мастацкая літаратура, 2015. - 78, [2] с.
Гэта кніга складаецца з трох казачных гісторый. А аб’ядноўваюцца яны тым, што ў кожнай з іх дзейсныя асобы — жыхары вадаёмаў. Магчыма, таму, што аўтарка нарадзілася і вырасла ля возера, якое дагэтуль лічыць найпрыгажэйшым у Беларусі. Водная прастора заўсёды захапляла яе. Пісьменніца любіла доўга-доўга ўглядацца ў глыбіні, уяўляючы сабе жыццё падводнага свету. Ёй заўжды было цікава паглядаць на сусвет не толькі сваімі вачыма, бо вакол кожную хвіліну адбываецца столькі цудаў, на якія чалавек часам не звяртае ўвагі. У выніку з’явіліся вось гэтыя казачныя гісторыі.


Гапееў, Валерый Мікалаевіч. Урокі першага кахання : аповесці / Валерый Гапееў. - Мінск : Лiтаратура i Мастацтва, 2011.- 189с. - ( Пераходны ўзрост).
Кнігу склалі аповесці “Усё цудоўна, або Урок бяспечнага кахання”, “Лёшкава каханне, або віртуальнае дрэва рэальнасці”, “Першы боль, або Доказ закона прыгажосці”. У цэнтры кнігі – сучасныя падлеткі. Характары герояў раскрываюцца ў аповесцях праз сацыяльныя, маральныя, эратычныя праблемы і пытанні росту.




Скаржынская-Савіцкая, Г. І. Прыгоды хамячка Тошкі : казка / Ганна Скаржынская-Савіцкая ; [мастак Л. Галубец]. - Мінск : Беларуская Энцыклапедыя імя Петруся Броўкі, 2013. - 35 с. 
Гэта казка пра гарэзлівага хамячка Тошку, які выпадкова аказаўся на волі. Нягледзячы на тое, што Тошка доўга жыў у хатніх умовах, ён змог пераадолець усе цяжкасці, якія сустрэліся на яго шляху, знайшоў сабе сапраўдных сяброў.